Magapatigayon sang hugot nga inspeksyon kag compliance monitoring ang Maritime Industry Authority (MARINA) Region 6 sa mga barko kag mga crew kadungan sa pag-obserbar sang pista minatay subong nga tuig.
Sa interview sang Bombo radyo kay Atty. Nicole Marie Amuan-Arpa, spokesperson sang MARINA, iya ginpahayag nga ini ang kabahin sang pagsunod sang ahensya sa direktiba sang Department of Transportation (DOTr) kasunod sa ginapaabot nga pagdamo sang mga pasahero nga magapauli sa ila tagsa ka probinsya.
Magasugod ang inspeksyon sa Oktubre 29 tubtob Nobyembre 3 agud masiguro ang kaluwasan sang mga pasahero sa pagbyahe.
Suno kay Atty Arpa, maga-deploy sila sang ila nga mga personnel sa mga pantalan nga sakop sang ila area of responsibility agud tutukan ang kahimtangan sang mga barko, pagsunod sa maritime safety regulations, kag kahandaan sang mga tripulante sa pag-atubang sa tion sang emerhensya.
Pahayag niya, lakip sa mga pantalan nga sakop sang ila monitoring amo ang Parola Wharf kag Lapuz RoRo Wharf sa Iloilo City, amo man ang mga pantalan sa Bacolod, Dumangas, kag Caticlan.
Ginpahayag man niya nga lakip man sa compliance monitoring ang pagsiguro nga nagasunod ang mga shipping vessel sa nagakaigo nga operating requirements antes kag sa tion sang pagbiyahe.
Dugang pa niya, ginatinguhaan sang MARINA-6 nga malikawan ang mga paglapas sa safety regulations kag mapadayon ang hapsay kag luwas nga pagbiyahe sang mga pasahero kasunod sa pagsaulog sang Undas 2026.
