Ginsaway sang Commission on Audit (COA) ang Iloilo City Government angot sa kakulangan sa pagkontrol sa koleksyon sang market fees kag iban pa nga revenue.
Kaangot ini sa padayon nga paghatag sang katungdanan sa pagkolekta sa mga indibidwal nga wala sang required fidelity bonds kag ang pag-transfer sang accountable forms kag nakolekta nga mga revenues sa job order workers.
Sakop sang audit ang Local Economic Enterprises (LEEs) kun sa diin kabahin ang mga pulic markets kag iban pa nga revenue-generating facilities, kaangay sang Iloilo Terminal Market, Iloilo Central Market, Jaro Big Market, kag iban pa.
Sandig sa inventory sang manpower sang audit, nga may ara sang 15 ka plantilla personnel nga naga-perform sang collection-related functions nga may ara sang fidelity bonds samtang anom ka plantilla personnel ang wala sang ini nga bonds.
Nadiskubre man nga may 69 ka job order workers nga naga-perform sang functions angot sa proseso sang koleksyon nga wala sang fidelity bonds.
Ang fidelity bond amo ang nagahatag sang proteksyon batok sa financial losses gikan sa dishonesty ukon misappropriation of funds sang isa ka personnel.
Ang table nagsakop sang mga personnel nga assigned sa pila ka pasilidad kaangay ang mga merkado publiko sa syudad kag ang New Slaughterhouse kag designated public parking areas.
Gin-abi-abi sang COA ang pagkinahanglan sa pag-augment sang personnel bangud sa kadamuon sang transaksyon sa mga public markets kag ang numero sang mga sapat nga ginaihaw sa slaughterhouse.
Apang, ginpunto sang auditors nga ang delegasyon sang collection responsibilities sa mga unbonded workers ang wala nasakop sa fidelity bonds sang mga accountable officers nga amo ang nag-assign sa ila.
Suno sa COA, ini nga arrangement ang mahimo magresulta sa problema kun sa diin ang syudad may yara sang limitado ukon wala gid sang paagi agud ma-recover ang mga kapierdehan kun madula ang accountable forms ukon sala ang paggasto sang kwarta sang publiko.
