Ginsaway sang Commission on Audit (COA) ang delayed nga pag-refund sang P1.47 milyon nga wala magamit nga cash advance sa Iloilo City kun sa diin involved diri ang 16 ka accountable officers.
Base sa 2025 nga audit findings, nagpaandam ang COA nga ang amo nga delay ang naglimita sa access sa government resources kag gin-expose ang kwarta sa risgo sang sala nga paggamit.
Base sa COA report, yara sa P1,746,473.04 ang kabug-usan sang kwarta nga wala pa mabalik apang ang nakalista naman sa Table 2, yara ini sa P1,475,835.79 ukon may deperensya nga P637.25 nga dapat pa i-reconcile.
Ginplastar naman sang mga accountable officers ang pila sa mga rason sa delay nga nagalakip sang extended holiday period, mga sala sa claims, kag pagkalakip sang mga benepisyaryo nga indi eligible.
Apang pahayag sang COA nga gilayon nga ibalik ang pondo sa publiko kaupod ang pagsumiter sang liquidation report bisan wala pa matapos ang review sang Accounting Division.
Sa subong, wala pa nakumpirma kun nabalik ang kabug-usan sang pondo, gani, ginrekomendar sang COA nga dapat mas istrikto ang pag-monitor sang cash advances kag pagpatuman sang nagakaigo nga mga tikang para diri.
Wala naman gin-identify ang ginatumod nga 16 ka mga accountable officers kag nagapabilin sila nga “unknown” sa karon.
