Nagpahanumdom ang Iloilo City Police Office sa mga estudyante nga nagahandum nga mangin myembro sang Philippine National Police (PNP) nga importante gid nga mangin disiplinado sa ila kaugalingon.
Kasunod ini sang pila ka mga insidente ukon violations kun sa diin involved ang criminology students sa pila ka lugar sa bug-os nga Pilipinas lakip na ang isyu sa iligal nga druga.
Sa interview sang Bombo Radyo kay ICPO Spokesperson PMAJ. Shella Mae Sangrines, iya ginpahayag nga kabahin sa mga dapat dumdumon sang mga estudyante nga ang trabaho bilang police personnel ang isa ka responsibilidad kag indi basta-basta.
Suno sa iya, sa idalom sang ICPO, ginasiguro gid nga ginagiyahan sang insakto ang criminology interns agud makakuha ang mga ini sang inspirasyon nga mangin maayo nga public servant sa pila ka tuig.
Pahayag niya, mas mangin maayo man para sa mga estudyante nga mangin aktibo sa mga community outreach programs, sa baylo nga mangin kabahin sang isyu ukon krimen nga mangin dako nga huol sa ila nga handum.
