Naghingagaw sa pagduaw, nagdala sang mga bulak, kag nagsindi sang kandila ang pila ka mga pumuluyo nga may mga minatay sa Chinese Cemetery sa Barangay Infante, Molo, Iloilo City.
Sa pag-check sang Bombo Radyo sa lugar subong nga udto, malaka na lang ang nagbisita subong nga All Souls’ Day, Nobyembre 2.
Isa diri si alias Tita nga nagduaw sa iya amay kag iloy amo man sa iya mga utod nga nalubong sa amo nga patyo.
Pahayag sini, sa kada Nobyembre 1 gid ang iya nakaandan nga pagbisita, apang na-ulihi ini subong bangud nga nag-ulan kahapon sa syudad.
Suno sa iya, ang iya amay nga nagtaliwan sang 1988 amo ang isa sa una nga ginlubong sa amo nga Chinese cemetery.
Ginpakigbahin sini nga nagasindi sila sang Chinese candle sa pantyon agud madugay nga matunaw; samtang sa ila balay naman, may prutas sila nga ginahalad sa laragway sang ila nagtaliwan nga himata.
Sa amo nga patyo, may yara man sang naga-practice sang pagsunog sang paper money nga amo naman ang paagi sang mga Chinese sa pagpadala sang material wealth kag pagtatap sa ila nagtaliwan nga mga himata ukon yara na sa pihak nga kinabuhi.
