Ginahatagan sang mas madalom nga pagtalupangod ang mga tinaga nga “the communion of saints” sa Apostles’ Creed paagi sa pagsaulog sang All Saints’ Day kag All Souls’ Day.
Ini ang ginpahangop ni Msgr. Meliton Oso, director sang Jaro Archdiocesan Social Action Center (JASAC), samtang padayon ang pagbisita sang mga tawo sa ila nga mga minatay halin kahapon nga Adlaw sang mga Santos, tubtub subong nga Nobyembre 2, Adlaw sang mga Kalag.
Suno kay Msgr. Oso, isa lang ang Simbahan nga may tatlo ka communities nga amo ang Triumphant Church sa langit; ang Suffering Church sa purgatoryo; kag ang Militant Church sa kalibutan ukon nagarepresentar sang mga buhi.
“Isa ka simbahan nga may tatlo ka communities, kag ining tatlo nagabuligay,” suno kay Msgr. Oso.
Pahayag sini, ang mga Santos dapat nga magserbe nga inspirasyon kag pagpanghangkat agud nga ikabuhi ang beatitudes.
Ang mga kalag naman sa purgatoryo suno kay Msgr. Oso ang makabulig man sa mga buhi paagi sa ila nga intercession.
Apang dugang niya, labi nga kinahanglan ang bulig sang mga buhi para sa mga nagtaliwan na paagi sa pagsakripisyo sa pagpangamuyo.
Ginbalikan ni Msgr. Oso ang iya homily kadungan sang Solemnity of All Saints nga nagasaad sang pag-angkon sang plenary indulgence para sa mga kalag sa purgatoryo paagi sa pagbisita sa mga patyo kag pagpangamuyo, sa kondisyon nga nakakumpisar, nakasimba, nakakalawat, kag nagapangamuyo para sa intensiyon sang Santo Papa.
“Paagi sina, mabuligan naton nga makapa-langit dayon ang kalag sa purgatoryo nga partikular nga ginahalaran naton sang plenary indulgence,” suno kay Msgr. Oso.
Dugang sini: “We strongly urge you to gain the plenary indulgence for your beloved soul in purgatory by making a good confession, receiving Holy Communion, and praying for the intention of the Holy Father.”
Kahapon, sa All Saints’ Day, nagbilin man sang pagpanghangkat ang Simbahan paagi sa mga tinaga ni Pope Francis: “to be saints is not a privilege for the few, but a vocation for everyone.”
Buot silingon suno kay Msgr. Oso, “tanan kita ginatawag sang Diyos nga mangin Santos. Ginatawag ka nga mangin Santos. Ginatawag ako nga mangin Santos. Tinguhaan ta nga mapangabuhi ang beatitudes —ang Ebanghelyo nga bag-o lang ninyo nabatian kay ina ang mangin giya naton agud mangin mga Santos.”#
