Ginmando sang Korte Suprema (SC) nga hilwayon ang isa ka misis nga nagpatay sa iya bana nga pulis sang 2011 matapos ginkilala ang iya depensa nga battered woman syndrome ukon epekto sang malawig nga pag-abuso sa iya.
Sa desisyon nga ginsulat ni Senior Associate Justice Marvic Leonen, ginbaliskad sang SC ang nauna nga desisyon sang Court of Appeals kag mas manubo nga korte nga nagkondenar sa babayi sa kaso nga parricide kag naghatag sa iya sang silot nga reclusion perpetua.
Gin-ako sang misis nga ginluthang niya ang bana gamit ang service firearm sini matapos ang sobra duha ka tuig nga pisikal kag emosyonal nga pagpang-abuso.
Suno sa rekord, sang Pebrero 8, 2011, ginkastigo siya sang bana, ginhaboy ang ila bata kag ginpahog nga patyon gani iya ini ginluthang.
Ginpahayag sang SC nga sakop ang babayi sang proteksyon sang Republic Act 9262 ukon Anti-Violence Against Women and Their Children Act, nga nagahatag proteksyon sa mga babayi nga may battered woman syndrome.
Ginkonsiderar man sang korte ang ebidensya sang balik-balik nga pagpang-abuso kag resulta sang psychological assessment nga nag-angot sang iya kahimtangan sa malawig nga pagpamintas sang iya bana.
