Ginatinguhaan gid ni Msgr. Meliton Oso nga magpanindugan para sa mga imol kaangay sang halimbawa ni Saint Oscar Romero nga amo ang Roman Catholic martyr nga nangin simbolo sa kalibutan para sa human rights and justice.
Ini ang ginpakigbahin ni Msgr. Oso kadungan sang iya sermon sa Jaro Metropolitan Cathedral subong nga Nobyembre 1, All Saints’ Day.
Suno kay Msgr. Oso nga amo subong ang director sang Jaro Archdiocesan Social Action Center (JASAC), isa sa iya inspirasyon ang amo nga Santo nga nagdedikar sang iya kabuhi agud nga madepensahan ang kinamatarong sang iya isigkatawo ilabi na sang mga pigado.
Si Saint Oscar Romero amo ang Archbishop of San Salvador halin sang 1977 tubtub nga siya ang ginpatay sang 1980. Gin-canonize siya ni Pope Francis bilang isa ka Santo sang Oktubre 14, 2018.
Isa siya sa pinakamatunog nga kritiko sang human rights violations sa El Salvador kag amo ang nangin tingog para sa mga biktima sang civil war.
Apisar sang mabug-at nga press censorship, nangin paagi ang iya kada semana nga radio broadcasts agud mahibaluan sang publiko ang mga kalakasan nga nagakatabo sa ila nga pungsod.
Gindepensahan sini ang kinamatarong sang katawhan nga magpanawagan para sa pagbag-o sa pulitika rason nga ginlagas ini sang mga lider sang El Salvador.
Isa ka adlaw antes ang iya kamatayon, ginpanawagan pa sini sa mga soldado kag pulis nga indi pagsundon ang mga mandu nga mangpatay sang mga sibilyan.
“Mismo si Archbishop Romero ang nagsiling nga the mission of the Church is to identify itself with the poor and stand with the poor in their struggles for justice. Ina nga kabuhi ni St. Oscar Romero nagahangkat sa akon bilang pari nga dapat ang Simbahan nga ginapakamahal ko kag ang mga ministro sini, katulad sang halimbawa ni St. Oscar Romero, identifying ourselves with the poor and standing by their struggles for justice,” suno pa kay Msgr. Oso.
Nahinambit man sini nga nangin “Meliton” ang iya pangalan bangud may sangay siya nga Santos nga amo ang magapangamuyo para sa iya, kag ginahimo man sini nga inspirasyon.
Ini amo si Saint Melito of Sardis nga isa ka prominent 2nd-century Christian bishop, apologist, kag ecclesiastical writer sang Sardis sa Lydia nga isa ka ancient kingdom kag rehiyon sa western Anatolia.
“Isa siya ka Santos nga eksperto sa Scriptures, gani ang panghangkat sa akon sang akon mentor, sang naga-masteral ako sa Scriptures amo nga ilugon si Saint Melito of Sardis. Ginatinguhaan ko gid kay siya ang akon nga inspirasyon sa akon pagtuon, pagpangadi nga ginagamit ang Bibliya,” dugang sini.#
