Nagkinadlaw ang mga tumalan-aw sa lahog ni Pope Leo XIV kadungan sang iya pag-atubang sa mga estudyante sang University of Notre Dame nga kilala nga “Fighting Irish” kag Villanova University nga amo naman ang iya alma mater.
Maga-atubangay ang duha ka eskwelahan sa college basketball game sa Roma sini nga November 1.
Antes ang hampang, nagpakigkita anay ang mga estudyante, faculty, staff, kag alumni sa Pope sa Vatican.
Suno kay Pope Leo XIV nga kilala bilang si Robert Francis Prevost, sang nagdaku siya sa Chicago, USA, masami niya mabatian ang cheers para sa “Irish”, apang dugang niya, “as you all know, Prevost graduated from Villanova” nga ginhugyaw naman sang mga estudyante halin sa iya unibersidad.
Diri na kag ginhambal ni Pope Leo nga wala siya sang ginaapinan bilang Santo Papa. Apang pahayag pa sini, “Prevost has another opinion, but we won’t do that now” rason nga nagkinadlaw ang tanan.
Sa iya address, ginpahangop man sang Pope ang importansya sang sports nga naga-promote sang fraternity, solidarity, kag kalinong, ilabi na sa tyempo kun sa diin masami nga ginabahin-bahin sang teknolohiya ang mga katawhan.
“By acting as a concrete means of bringing people together, athletics can teach the values of cooperation and mutual sharing. This is increasingly necessary in an age marked by the distance that can be created by technology,” pahayag sini.
Nahibaluan nga naglab-ot sa 7,000 ang nagtambong sa amo nga meeting sa Paul VI Audience Hall lakip na si Father Peter Donohue, President sang Villanova University, kag Father Robert Dowd, President sang University of Notre Dame.#
