Ginkumpirma sang Vatican nga madayon ang pagbisita ni Pope Leo sa Uruguay, Argentina, kag Peru halin Nobyembre 6 tubtob 17 matapos ang iya operasyon bangod sa cancer sa baga.
Suno sa Vatican, maayo ang kahimtangan sang Santo Papa base sa pinakabag-o nga medical examinations kag wala sang nakit-an nga ano man nga contraindications nga mangin balabag sa iya pagbiyahe.
Sa operasyon sang Oktubre 13, ginkuha sang mga doktor ang idalom nga bahin sang tuo nga baga sang 71-anyos nga Santo Papa. Natukiban man nga may yara siya sang lung adenocarcinoma, ang pinaka-common nga klase sang cancer sa lungs.
Ginpahayag naman sang personal physician ni Pope Leo nga si Dr. Luigi Carbone nga nagapadayon sang maayo ang iya pag-recover kag maayo ang resulta sang iya mga eksaminasyon.
Ginapaabot nga mangin isa ini sa pinakamabudlay kag pinakamabug-at nga pagbiyahe sa iban nga pungsod sang isa ka lider sang Simbahang Katolika sa nagligad nga pila ka dekada. Nakatalana nga magbiyahe si Pope Leo sang mga 31,000 kilometro sa 10 ka syudad kag maghatag sang 36 ka mga speech sa bug-os nga tion sang iya pagbisita.
Ginkumpirma man sang Vatican nga wala sang pagbag-o sa nauna na nga ginpagwa nga schedule sang iya pagbiyahe.
Matandaan nga sang Domingo, nakighambal si Pope Leo sa mga tumuluo sa St. Peter’s Square.
Apang, suno sa laygay sang iya mga doktor, kanselado ang iya nakatalana nga isa ka adlaw nga pagbisita sa Assisi sa Italy sini nga Martes.#
