Nagpagwa ang Department of Education (DepEd) sang bag-o nga guidelines para sa mga eskwelahan bilang pagpanghanda sa ginapaabot nga Super El Niño.
Lakip diri ang pagsuspinde sang tanan nga face-to-face kag home-based academic activities kun maglab-ot sa 42 degrees Celsius ang temperatura.
Sa idalom sang DepEd Memorandum No. 64, Series of 2026, nga ginpirmahan ni Education Secretary Sonny Angara, katuyuan sang polisa nga protektahan ang ikaayong lawas sang mga estudyante kag mga personnel sang eskwelahan, samtang ginapasiguro nga magapadayon ang pagtuon sa tion sang tuman nga tig-ilinit.
Pahayag sang DepEd official, kinahanglan nga temprano ang pagpanghanda sang mga eskwelahan sa baylo nga hulaton pa nga mag-abot ang sobra nga kainit antes maghimo sang tikang.
“We cannot afford to wait until extreme heat hits before we act. Our plan this year is proactive, deliberate, and organized…We are making sure our schools are fully prepared to manage heat stress, water shortages, and health risks, protecting the safety and well-being of our learners and personnel without unnecessarily sacrificing precious classroom time,” suno kay Angara.
Base sa guidelines, awtomatiko nga suspindihon ang tanan nga pisikal nga klase kag home-based academic activities kun maglab-ot sa 42°C ang temperatura.
Kun yara sa 33 tubtob 41°C ang temperatura, suspindido ang face-to-face classes kag magapatigayon ang mga estudyante sang mas mamag-an nga mga buluhaton sa pagtuon sa balay, upod ang regular nga pag-monitor sang ila kahimtangan.
Kun yara sa 27 tubtob 32°C ang temperatura, mahimo panubuon sang mga school head ang oras sang face-to-face classes ukon magpatuman sang hybrid kag flexible nga schedule sang pagtuon sa balay.
Mahimo naman magpadayon ang regular nga face-to-face classes nga may nakatalana nga pagpahuway para sa pag-inom sang tubig kun manubo sa 27°C ang temperatura.
Suno sa DepEd, mahimo i-angay sang mga school head ang schedule kag paagi sang pagtuon base sa aktuwal nga kahimtangan sang panahon sa ila lugar.
Magasugod gilayon ang pagpatuman sang polisa kag magapabilin ini tubtob nga opisyal nga ipahibalo sang Philippine Atmospheric, Geophysical and Astronomical Services Administration (PAGASA) ang katapusan sang 2026–2027 El Niño episode.#
