Ginarekomendar sang Department of Education (DepEd) sa mga estudyante ang pagsuksok sang sleeveless ukon sando agud makabulig sa pag-atubang sang epekto sang nagataas nga temperatura bangud sa El Niño.
Sa interview sang Bombo Radyo Iloilo kay Leonil Salvilla, spokesperson sang Schools Division of Iloilo, ginpahayag sini nga rekomendasyon lamang ang pagsuksok sang sleeveless kag indi ini mandatory sa tanan nga eskwelahan.
Suno kay Salvilla, indi man tanan nga eskwelahan nagaeksperyensya sang sobra nga kainit, bangud mas mabatyagan ini sa mga eskwelahan nga yara sa mga patag nga lugar, samtang mas mabugnaw sa mga bukiron nga bahin kag mga isla.
Dugang pa sini, may yara man sang iban nga tikang nga mahimo ipatuman agud masiguro nga magapabilin nga maayo ang pagtuon sang mga estudyante sa mga classroom apisar pa magtaas ang temperatura.
Ginatinguhaan naman sang Department of Education nga makapadayon sa gihapon sa pagtuon ang mga estudyante sa tunga sang mainit nga panahon.
