Ginapabaskog sang Iloilo City Government ang oportunidad nga makapadayon sa kolehiyo ang mga estudyante nga persons with disabilities (PWDs) ukon “differently-abled citizens.
Ini paagi sa educational assistance program sang Persons with Disability Affairs Office (PDAO).
Ini nga programa ang para sa mga persons with disabilities nagahatag sang ₱5,000 nga allowance sa kada semester.
Sa interview sang Bombo Radyo kay Eleanor Gregorio, Officer-in-charge sang PDAO, iya ginpahayag nga nagalab-ot na sa 50 ang mga scholar nga ginabuligan sang programa, halin sa una nga 15 lamang.
Bukas ini sa mga PWD nga nagakuha sang bisan ano nga four-year college courses.
Suno sa iya, wala man nagapatuman sang mataas nga grade requirement ang programa, bangud passing grades lamang ang ginapangayo, basta mapasar sang mga PWD scholar ang ila mga subject kag makapadayon sa ila pag-eskwela.
Isa sa mga ehemplo sang kadalag-an sang programa amo ang isa ka graduate sang Bachelor of Science in Developmental Communication sa West Visayas State University, Batch 2026, nga nag-graduate bilang Magna Cum Laude.
Dugang pa ni Gregorio, nagapakig-angot man sila sa nagkalain-lain nga PWD organizations agud masuportahan ang ila mga programa sa edukasyon, livelihood kag awareness sa pagpahangop sang kinaiya sang mga PWD.
Ginapatigayon man nila ang mga seminar kag lecture kung ginapangabay sang mga organisasyon kag komunidad, lakip ang imbitasyon sang Philippine Coast Guard sa ila opisina.
Nagapanawagan man si Gregoro sa iban pa nga PWD students nga luyag magkuha sang four year courses nga magpalapit sa ila opisina agud mahibaluan ang mga kinahanglanon kag makapamangkot parte sa scholarship program.
