Gintawag ni City Councilor Sheen Marie Mabilog nga isa ka “political move” kag “tyranny of the majority” ang pag-adoptar sang Iloilo City Council sang committee report nga nagasuporta sa Department of the Interior and Local Government (DILG) Legal Opinion No. 95, series of 2025.
Ini ang may kaangtanan sa pag-limit sa gahum ni Vice Mayor Lady Julie Grace “Love-Love” Baronda sa Sangguniang Panlungsod.
Suno kay Councilor Mabilog, mahimo ini magpahipos sa bise alkalde kag mag-limit sa iya nga magduso sang mga ordinansa ukon resolusyon.
Ginkwestiyon man ni Mabilog kun may probisyon bala sa Local Government Code (LGC) nga nagadeklara nga ilegal ang pagpangabay ukon pagpapanugyan sang mga ordinansa sang isa ka vice mayor.
Gindugang pa niya nga indi binding ukon obligasyon nga sundon ang nasambit nga opinion, kag ginpahayag nga may yara man sang mga memorandum circulars ang ahensiya nga wala ginapatuman.
Para kay Mabilog, indi lamang si Baronda ang mahimo maapektuhan sang amo nga desisyon, kundi pati ang masunod nga mga bise alkalde nga mangin kabahin sang Sangguniang Panlungsod.
Bisan mahimo maglain ang opinyon sang mga konsehal sa nagkalain-lain nga isyu, ginpaathag niya nga dapat hatagan sang kahigayunan ang kada miyembro sang konseho nga magpanugyan sang mga tikang para sa kaayuhan sang syudad, basta wala nagalapas sa Local Government Code.
Text by: Bombo Cyrene Nacis
