Na-apresyar ni Iloilo City Vice Mayor Lady Julie Grace Baronda ang mga pagkaon nga ginpadala para sa ila ni City Councilor Sheen Marie Mabilog subong nga adlaw, Nobyembre 11.
Sa interview kay Baronda, madamo ang nag-message, nag-post kag nag-comment matapos ang natabo sang nagligad nga semana, nga nagpromisa nga magpadala sang snacks sa session sang Sangguniang Panlungsod.
“After what happened last week, madamo ang nag-message, nag-post, nag-comment that they will bring snacks sa Iloilo City Council session,” pahayag ni Baronda.
Gin-apresyar sang opisina ni Baronda ang suporta kag effort sang publiko, apang ila ginpangabay nga mas maayo nga ang pondo nga igagasto sa pagkaon i-donate na lamang sa nagkalain-lain nga programa sang siyudad agud mas madamo nga pumuluyo ang makabenepisyo.
“Although, we appreciate their effort and support, ginhambalan sila namun nga kung may ipadala sila nga snacks, ihatag na lang ang fund sa different programs sang siyudad para makabulig sa pumuluyo,” dugang pa niya.
Pero wala gihapon ini nakapugong sa pila ka pumuluyo nga nagpamilit gid nga magpaambit sang ila blessings.
Gani, gintawag nga “overwhelming” ni Baronda ang natabo bangud bisan natapos na ang session, padayon ang pag-abot sang boxes sang siopao kag burger nga ginpanagtag na lamang sa nagkalain-lain nga opisina sang Iloilo City Government.
Text by: Bombo Cyrene A. Nasis
