Ginkadismaya sang National Union of Students of the Philippines (NUSP)-Panay ang pag-adoptar sang Iloilo City Council sang DILG Legal Opinion No. 95, series of 2025, nga nagalimitar sa legislative participation ni Vice Mayor Lady Julie Grace “Love-Love” Baronda, paagi sa 13-1 nga boto sang Oktubre 21, 2026.
Suno sa grupo, nagapakita ini sang makasulubo nga ehemplo sa masunod nga henerasyon sang mga lider kag nagapabutyag sang pagpangibabaw sang politikal nga interes sa baylo nga pagtutok sa problema sang pumuluyo, kaangay sang pagsaka sang presyo sang balaklon, kakulang sang tubig, rotational brownouts kag kakulang sang masaligan nga pampubliko nga transportasyon.
Ginpahayag sang NUSP-Panay nga dapat mangin espasyo sang bukas nga diskusyon, pagbinaylohanay sang ideya kag konstruktibo nga debate ang konseho, agud masiguro nga ang mga ordinansa kag resolusyon nagaserbisyo sa kaayuhan sang publiko, indi sa politikal nga alyansa.
Ginpaandaman man sang grupo nga mahimo ini mangin delikado nga precedent sa local government bangud mahimo maghatag sang impresyon nga ang mga lider nga wala nagaugyon sa mayorya ukon nagakwestyon sa mga yara sa poder mahimo pahipuson kag limitahan ang partisipasyon.
Dugang pa, indi dapat kabigon nga balabag ang indi pag-ugyon, bangud importante ang kritisismo kag pagkwestyon sa pagsiguro sang accountability sang mga opisyal.
“Leadership is not measured by how effectively one consolidates power or suppresses opposition, but by how faithfully one upholds democratic principles and responds to the needs of the people,” suno sa NUSP-Panay.
Ginpahanumdoman man sang grupo ang mga student leader nga ang matuod nga pagpanguna indi natakos sa kadakuon sang gahum ukon pag-unong sa politikal nga alyansa, kundi sa pagbaton sang kritisismo, pagkilala sa kakulangan kag pag-una sa kaayuhan sang pumuluyo.
Text by: Bombo Cyrene A. Nasis
