Ginpunggan ni City Councilor Sheen Marie Mabilog ang pag-adoptar sang committee report nga nagasuporta sa Department of the Interior and Local Government (DILG) Legal Opinion No. 95, series of 2025 nga may kaangtanan sa limitado nga gahum ni Vice Mayor Lady Julie Grace “Love-Love” Baronda sa Sangguniang Panlungsod.
Sa iya pagpabutyag, ginlaragway ni Mabilog nga ang pag-adoptar sang nasambit nga opinion bilang isa ka “political move” kag “tyranny of the majority,” bangud suno sa iya, mahimo ini magpahipos sa bise alkalde kag maglimitar sa iya nga magduso sang mga ordinansa ukon resolusyon.
“This is what happens when you are not aligned with this administration: your voice is being suppressed and your proposals are being brushed aside,” pahayag ni Mabilog.
Ginkwestiyon man ni Mabilog kung may probisyon bala sa Local Government Code (LGC) nga nagadeklara nga ilegal ang pagpangabay ukon pagpapanugyan sang mga ordinansa sang isa ka vice mayor.
“I see malice in this move,” dugang pa ni Mabilog, nga nagapati nga mas nagatuhaw sa amo nga kontrobersiya ang pagbahin sang political parties sang mga katapo sang konseho.
Gindugang pa niya nga indi binding ukon obligasyon nga sundon ang nasambit nga opinion, kag ginpahayag nga may yara man sang mga memorandum circulars sang ahensiya nga wala ginapatuman.
Para kay Mabilog, indi lamang si Baronda ang mahimo maapektuhan sang amo nga desisyon, kundi pati ang masunod nga mga bise alkalde nga mangin kabahin sang Sangguniang Panlungsod.
“This will create a dangerous precedent that will affect the conduct and duties mandated of the City Council,” siling ni Mabilog.
Bisan mahimo maglain ang opinyon sang mga konsehal sa nagkalain-lain nga isyu, ginpaathag niya nga dapat hatagan sang kahigayunan ang kada miyembro sang konseho nga magpanugyan sang mga tikang para sa kaayuhan sang syudad, basta wala nagalapas sa LGC.
Text by: Bombo Cyrene A. Nasis
