Ginaduso sang Committee on Disaster Risk Reduction and Management (DRRM) sang Sangguniang Panlalawigan ang resolusyon nga nagapanugyan sa pagbakal sang long-arm backhoe kag pagtukod sang communal fishponds bilang kabahin sang preparasyon sang probinsya sa ginapaabot nga very strong El Niño.
Suno kay Iloilo Fourth District Board Member Rolando Distura kag chairman sang Committee on DRRM, ini nga inisyatibo ang gindiskusyonan sa nangin committee hearing upod ang nagkalain-lain nga government agencies kag mga departamento sang Iloilo Provincial Government agud mahibaluan ang mga tikang nga mahimo ipatuman sa posible nga epekto sang weather phenomenon.
Suno kay Distura, mahimo magamit ang communal fish ponds ang magserbe bilang water storage areas nga makasuporta sa fish production agud nga maka-provide sang dugang nga source sang pagkaon kag magadugang man kita sa mga mangunguma.
Sa tion man sang mabaskog nga pag-ulan, mahimo ini temporaryo nga magsalo sang sobra nga tubig, nga mahimo kontrolado nga ipagwa paagi sa husto nga drainage kag overflow systems.
Samtang, ang propose nga pagbakal sang long-arm backhoe mahimo makabulig sa dredging operations, lakip na ang pagkaskas sang accumulated sediment halin sa mga waterways kag drainage channels agud mapaayo ang pag-ilig sang tubig.
Dugang pa ni Distura nga ginapanukala nga gamiton ang disaster ukon calamity fund sa pagbakal sang nasambit nga equipment, nga igapahamtang sa Provincial Agriculture Office agud masuportahan ang implementasyon sang mga proyekto.
