Verbal agreement lamang ang basehan sa tunga sang Iloilo City Police Office (ICPO) kag Iloilo City Traffic and Transportation Management Office (ICTTMO) sa pagpahanugot sa mga patrol vehicle sang kapulisan nga magliko sa pedestrian lane sa General Luna Street, Iloilo City, pasulod kag paggwa sa opisina.
Matandaan nga sang damlag lang nakuhaan sang litrato ang patrol car sang Women and Children Protection Desk (WCPD) sang Iloilo City Police Office (ICPO) nga nagliko sa pedestrian lane sa nasambit nga lugar.
Sa interview sang Bombo Radyo kay ICTTMO Head Retired Colonel Uldarico Garbanzos, iya ginklaro nga ginhatag sang amo nga permiso ang ICPO bangud sa operational activities sang mga kapulisan, ilabi na kun may yara sang emergencies.
Apang, gin-ako man ni Garbanzos nga wala sang executive order ukon city ordinance nga nagatugot sang nasambit nga permiso.
Suno man sa iya, ang ICPO mismo ang nag-request sang amo nga arrangement nga i-konsiderar ang ila operational needs kag ang U-turn slot sa General Luna Street.
Gin-athag man niya nga sa nasambit lamang nga dalan ginapasugtan ang mga patrol vehicle nga magliko, samtang indi ini nagakahulugan nga may kinamatarong na ang mga ini nga maglapas sa traffic regulations sa iban nga dalan.
Ginpahayag pa ni Garbanzos nga iya liwat gin-remind ang ICPO nga dapat may yara sang traffic signage sa lugar bangud nga may yara ini sang nagligad nga nakabutang.
Ginpabug-atan man niya nga dapat mangin modelo ang mga kapulisan sa mga motorista sa pagsunod sang mga traffic rules.
Pagpatpat man ni Garbanzos nga kung makadisgrasya ang patrol vehicle, ang driver ang posible nga magpanabat, depende sa resulta sang imbestigasyon kag sa mapamatud-an nga paglapas.
Dugang pa nga posible man ini nga mag-atubang sang civil ukon criminal liability kung may nagakaigo nga basehan, dugang pa ang internal investigation sang ICPO.
