Dako nga bugal sang University of San Agustin – College of Pharmacy matapos nga ma-secure ni Jason Rey Jimenez Peñaflorida ang ikatatlo nga pwesto sa nasyonal nga lebel sa October 2026 Pharmacists Licensure Examination, nga nakakuha sang outstanding rating nga 95.65%.
Sa interview sang Bombo Radyo Iloilo kay Peñaflorida, ginpahayag sini nga wala siya naglaum nga makasulod sa top. Apang, suno sa mga faculty sang unibersidad, ginapaabot na nila ining kadalag-an bangud sa iya kapisan kag kaalam.
Ginsaulog man sang unibersidad ang 35 ka bag-o nga lisensyado nga Augustinian pharmacists nga nakapasar man sa amo nga pasinawan.
Mahibaluan nga sadtong April 2026 Pharmacists Licensure Examination, nangin top 1 man sa nasyonal nga lebel si Royce Arjan Java Fantillan, produkto man sang USA, nga nakakuha sang rating nga 94.65%.
Dugang pa, ginkilala man ang University of San Agustin bilang No. 1 Top-Performing Pharmacy School sa pungsod sa amo nga pasinawan, matapos nga 122 sa 148 ka examinees ang nakapasar, nga may 82.43% nga passing rate.
Suno kay Dr. James Torres, dean sang College of Pharmacy and Medical Technology, daku ang ila pagpabugal kag kalipay sa ila mga topnotchers kag board exam passers bangud nangin inspirasyon ang mga ini sa iban nga mga nagakuha sang licensure examination.
Text By: Bombo Glenette Delit
