Nasapwan ang isa ka 23 anyos nga myembro sang LGBTQ plus community, nga wala na sang kabuhi sa Barangay Sohoton Barotac Nuevo pasado alas nuwebe kaina sang aga.
Sa interview sang Bombo Radyo kay Police Captain Francis John Layog, ang Officer in Charge sang Barotac Nuevo Municipal Police Station, iya gin pahayag nga ang biktima ang gin kilala kay alyas Sherwin, kag residente sang Barangay Patag Barotac Nuevo.
Gindugang niya nga sa isa ka irrigation canal sa Sohoton nakit an sang mga residente ang biktima kag gilayon sang mga ini nga gin report sa barangay, kag na inform ang kapulisan 9:55 kaina sang aga.
Suno kay Captain Layog, gilayon sila nga nag proceed sa area kaupod ang MDRRMO ukon ang Municipal Disaster Risk Reduction and Management Officers sang Barotac Nuevo kag gin dala ang biktima sa pinakalapit nga hospital apang gin declare ini nga dead on arrival.
Base sa initial nga invistigation, wala man sang nakit an nga pilas sa lawas sang biktima apang nag desisyon ang pamilya sini nga ipaidalom sa autopsy ang ila himata, gani nga gina assist na ang mga ini subong sang katapo sang kapulisan.
Gindugang man ni Layog nga base sa impormasyon nga gin hatag sang pamilya sang biktima, ini sya ang ulihi nga nakit-an kahapon sang hapon.
Ang biktima ang isa ka manikurista kag isa man ka hair stylist.
Sa subong gina schedule na ang autopsy sang biktima kag gahulat man ang kapulisan ang autopsy report agud masuguran ang maidid nga imbistigasyon, base sa kung may foul play nga natabo, ukon natural death ang kinamatay sang biktima.
By: Bombo Ireca Pioquinto
