Gina-usisa sang National Bureau of Investigation (NBI) ang mga bag-o nga impormasyon nga mahimo makabulig sa pagtultol sa ginapanaguan ni Senador Ronald “Bato” Dela Rosa.
Suno kay NBI Director Melvin Matibag, nakilala na sang ahensiya ang mga prayoridad nga lugar kag mahimo ini magpatigayon sang operasyon sa madali nga tion agud usisaon kon yara didto ang senador.
Gin-athag ni Matibag nga wala sila sang may palampuwason nga impormasyon nga mahimo makabulig sa pagpangita kay Dela Rosa.
“Well… we will not leave any stone unturned,” suno kay Matibag kaangot sa ila nga himuon nga search operation. “Lahat ng bato ay ating babaliktarin para mahanap natin si Senator Bato.”
Dugang pa niya, nagdamo ang mga impormasyon nga ginapadala sang publiko matapos ginpahibalo sang Department of the Interior and Local Government (DILG) ang paghatag sang P50-milllion nga padya sa makahatag nga impormasyon kun sa diin ang senador.
Apang, kinahanglan anay nga ipaidalom sa beripikasyon sang mga imbestigador ang mga impormasyon nga ila nabaton kag personal nga kadtuan ang mga lugar nga posible nga gintaguan ni Dela Rosa.
“Basta sa Pilipinas pa, ‘yun yung mas malaking information natin dito,” sabat ni Matibag sang ginkwestyon kun diri pa sa Pilipinas si Dela Rosa nga nagapangatubang sang arrest warrant halin sa International Criminal Court (ICC) kaangot sa crimes against humanity case bangud sa Duterte drug war.
Matandaan nga sang Byernes, nag-anunsyo an Philippine National Police (PNP) nga hatagan nila ang pugante nga senador sang isa ka semana nga ultimatum agud nga magsungka.#
