Ginpahalin sa pwesto ni Department of Public Works and Highways (DPWH) Secretary Vince Dizon ang 3 ka opisyales sang nasambit nga ahensiya sa Davao City sa tunga sang ginahimo nga imbestigasyon sang National Bureau of Investigation (NBI) may kaangtanan sa anomalya nga flood control projects sa pungsod.
Suno kay Dizon, nalakip sa mga ginpahalin amo sanday Davao District Engineer (DE) Richard Ragasa, Assistant Districy Engineer Lilibeth Sarmiento, kag Construction Chief Roberto Mamaril.
Ang mga nasambit nga opisyales ang kabahin sa 12 ka opisyales sang DPWH nga ginapasakaan sang sang kaso sang NBI sa Department of Justice (DOJ).
Madumduman nga ginsambit ni NBI Director Melvin Matibag nga ginarekomenda ang iya ahensiya sa DOJ nga magduso sang reklamo batok sa pila ka mga DPWH officials kag sa Genesis88 Construction bangud sa paglapas sang Anti-Graft kag Corruption Practices kag Falsification by Public Officer.
Dugang pa ni Matibag, ang Genesis88 nakabuol sang P7 bilyon nga balor sang flood control projects sa una nga Distrito sang Davao City.
Samtang, ginpahalin man ni Dizon sa posisyon si Engr. Roberto Catingub, construction chief sang Cebu 4th District bangud sa extortion sang mga kontratista.
Magluwas diri, may ara pa siya nga mga indibidwal nga imbestigaran kag ipasapubliko niya ini kun sin-o ang mga natumod nga persona sa sunod nga mga semana.
