Padilla sa pagpalagyo ni Bato: ‘Hindi kami tumakas, naglalakad kami’

Ginpanindugan ni Senator Robin Padilla nga wala siya nagbulig sa pagpalagyo ni Senator Ronald “Bato” dela Rosa halin sa Senado sang Mayo.

Ginhambal ini ni Padilla sang naghatag siya sang speech sa katapusan nga gab-i sang rally sang Iglesia ni Cristo (INC) sa Liwasang Bonifacio sa Manila.

Ginkwestyon ni Padilla kun ngaa kasuhan siya sang obstruction of justice, bangud suno sa iya, wala man sila nagpalagyo, kundi naglakat lamang.

“Iniisa-isa na kami sa minority. Kanina, paggising ko, pagtingin sa social media, ang sabi ay kakasuhan na raw ako. Pinatakas ko raw si Bato. Obstruction of justice daw ang ikakaso sa akin. Nakita n’yo ba ‘yung CCTV? Hindi kami tumakas, naglalakad kami. Ang tawag do’n, lokohan!” suno kay Padilla.

Matandaan nga sang Mayo 13 sang gab-i, may “shooting” nga natabo sa Senado nga nagpuhag sang bug-os nga pungsod kun sa diin gin-alegar ni anay Senate President Alan Peter Cayetano nga “under attack” sila — alegasyon nga ginbali sang Department of the Interior and Local Government (DILG) kasunod sang ila imbestigasyon.

Sang amo nga tion, didto sa sulod sang Senado si Dela Rosa nga ginhatagan nila sang “protective custody” kasunod sang pag-unseal na sang arrest warrant halin sa International Criminal Court (ICC).

Sang pasado alas dos sang kaagahon sang Mayo 14, nagpalagyo na sa Senate premises si Dela Rosa.

Una na naka-ako si Padilla nga ginpasakay niya si Senator Dela Rosa bangud naghingyo ini nga magsakay kag nagpanaog man sa Makati City kag wala na siya nakahibalo kun sa diin ini nagkadto.

Sang nagligad nga semana, nagmandu na ang Office of the Ombudsman kanday Cayetano, Padilla, kag former Senate Sergeant-at-Arms Mao Aplasca nga magkomento kasunod sang panumbungon batok sa ila nga amo ang obstruction of justice nga naangot sa pagpalagyo ni Dela Rosa.

Hunyo 3 sang gin-file sang civil society group nga Tindig Pilipinas ang amo nga complaint.#