Padayon ang Department of Science and Technology (DOST) Western Visayas sa pagmonitor sang mga kondisyon sang panahon, weather parameters kag climatic condition.
Ini agud makapreparar sang nagakaigo nga mga advisories para sa publiko sa tunga sang ginapangatubang nga El Niño phenomenon.
Sa interview sang Bombo Radyo kay DOST Western Visayas Regional Director Rowen Gelonga, iya ginpahayag nga may yara sang nagkalain-lain nga serbisyo ang DOST kag PAGASA nga mahimo magamit sang publiko sa pag-atubang sang epekto sang El Niño.
Gindugang man niya nga luwas sa pagpagwa sang mga advisories, ginapahulag man ang mga Provincial kag Regional Disaster Risk Reduction and Management Offices agud mangin aktibo sa pagpatuman sang nagakaigo nga mga tikang sa pag-atubang sang El Niño.
May panawagan man si Gelonga sa publiko nga sundon ang mga advisories kag guidelines nga ginapaguwa sang nagkalain-lain nga national government agencies, lakip na ang pagkinot sang paggamit sang tubig.
Samtang, ginpangabay man niya ang mga mangunguma nga hibaluon ang ila kapasidad kag limitasyon sa pagpananom, kag sundon ang mga rekomendasyon sang Department of Agriculture (DA).
Paagi sa padayon nga pagmonitor kag kooperasyon sang publiko, ginapaabot nga mangin mas handa ang mga komunidad sa pag-atubang sang epekto sang El Niño.
