Ginbuyagyag sang Department of Health (DOH) nga nalakip sa mga vape products ang kemikal nga formaldehyde nga amo ginagamit sa pag-embalsamar.
Suno sa post sa social media page sang DOH, indi maayo sa lawas ang nasambit nga kemikal bangud makatuga ini sang sakit sa tutunlan, ilong kag mata.
Pahayag pa sang ahensiya nga isa ini ka disinfectant nga kemikal kag napamatud-an nga carcinogenic ini ukon nagatuga sang kanser kun malawig nga tion ang exposure sini sa tawo.
Dugang pa sang DOH, indi lang formaldehyde ang makit-an sa vape kundi nagakalain-lain pa nga makahililo nga kemikal kaangay sang diacetyl, acrolein, cadmium kag iban pa nga kemikal.
Angot diri, nagpanawagan naman ang DOH sa publiko nga suportaran ang Sin Tax ukon ang buwis nga nagaprotekta sa ikaayong lawas sang mga Pilipino.
Suno sa ahensya, kinahanglan nga indi barato ang mga produkto nga mahimo makahalit sa kabuhi sang tawo.
