Ang mga pilas, singaw ukon indi normal nga mga nagatubo sa baba nga naglab-ot na sa duha ka semana, dapat na nga ipakonsulta sa dentista bangud posible ini nga senyales sang oral cancer.
Sa interview sang Bombo Radyo kay Dr. Hermina Ballesta-Gonzales, isa ka Dentist, Orthodontics, Esthetics kag Implantologist, iya ginpahayag nga lakip sa mga sintomas sang oral cancer ang puti ukon pula nga patches sa dila, gums kag sulod sang baba, pagbag-o sang tingog, may yara sang bukol sa liog, pagdugo kag kabudlayan sa pagtulon sang pagkaon.
Suno sa iya, lakip sa mga butang nga makapataas sang risgo sang oral cancer ang malain nga lifestyle sang isa ka indibidwal pareho sang pagpanigarilyo, kag pag-inom sang makahulubog nga ilimnon, kag makatuga Human papillomavirus (HPV) infection.
Pahayag pa sang dentista, ang sobra nga exposure sa adlaw ukon init ilabi na subong may ginapaabot nga super El Niño, ang mahimo man magpataas sang risgo sang nasambit nga cancer, gani importante nga protektahan ang baba sa paggamit sang lipbalm, pag-inom sang madamo nga tubig, kag pagkaon sang mga prutas kag utan.
Ginpatpat man ni Dr. Gonzales nga mahimo maglapta ang oral cancer sa iban nga parte sang lawas lakip na ang liog kag maapekto sa limog.
Apang, ginpaathag man sang doktor nga mabulong ang nasambit nga balatian paagi sa nagkalain-lain nga pamaagi, lakip ang operasyon, depende sa kondisyon sang pasyente.
Dugang pa, ginapahanumdom sang dentista ang publiko nga indi pagbalewalaon ang mga pilas ukon singaw nga wala nagakadula sang pila ka semana kag magpakonsulta gilayon agud mahibaluan ang nagakaigo nga pagbulong.
