Ginpakigbahin sang isa ka iloy nga may bata nga may congenital hypothyroidism (CH) ang ila eksperyensya kag mga kabudlayan nga nalampasan sa sulod sang 15 ka tuig nga pag-atipan sa iya bata, sa bulig sang newborn screening kag padayon nga giya sang mga doktor.
Sa interview sang Bombo Radyo kay Janice Entredicho, iya ginpahayag nga nahibaluan nila nga may CH ang iya bata paagi sa newborn screening sang bag-o pa lang ini natawo.
Suno sa iya, sang una nga nabal-an nila ang resulta, naglibog sila kon paano atubangon ang kondisyon sang ila bata, apang ginbuligan sila sang mga doktor nga maintindihan ang nagakaigo nga pag-atipan.
Kabahin sa ila ginahimo amo ang pagsiguro nga mainom sang bata ang bulong kada adlaw kag makapa-check-up kag blood test kada anom ka bulan agud mamonitor ang iya kahimtangan.
Pahayag niya, sa subong, normal ang adlaw-adlaw nga pagginawi sang iya nga bata kag ini ang naga-excel sa iya nga pagtuon kag ini ang kabahin man sa mga club organization sa ila nga buluthuan.
Dugang pa ni, Entredicho nga wala dapat sang kabalak-an nga daku ang mga ginikanan nga pareho sa iya nga may yara sang amo nga kondisyon ang ila bata bangud nga sa bulig sang mga doctor kag pagsundon sa treatment, sigurado nga mangin maayo ang kahimtangana sang isa ka bata kag mangin normal ang iya nga kabuhi.
