Wala nakapugong ang condition nga Congenital Hypothyroidism (CH) sa 15-anyos nga si Xyriel Jade Entredicho agud padayon nga mangin aktibo sa eskwelahan kag malab-ot ang iya mga handum.
Sa interview sang Bombo Radyo kay Entredicho, iya ginpakigbahin nga may mga tion nga nabatyagan niya nga lain siya sa iban nga kabataan bangod may dugang siya nga responsibilidad nga dapat dumdumon pareho sang pag-inom sang bulong kada adlaw, regular nga check-up kag pagsunod sa mga panugyan sang iya mga doctor.
Apang, suno sa iya, nagapati siya nga indi dapat mangin rason ang iya kondisyon agud indi na niya maubra ang iya nga gusto nga mga aktibidad.
Sa subong, miyembro siya sang school publication bilang isa ka sa journalist kag nagapabilin nga consistent honor student sa iya nga pagtuon.
Ginpakigbahin man niya nga indi dapat pagdulaan sang paglaum ang mga kabataan nga may pareho nga kondisyon sa iya bangud nga indi sila naga-isahanon, kag importante nga padayon nga atipanon ang ila kaugalingon kag sundon ang mga panugyan sang doktor.
Dugang pa ni Xyriel, bisan ang congenital hypothyroidism isa ka kondisyon nga kinahanglan tutukan sa bug-os nga kabuhi, nagapakita ang iya eksperyensya nga mahimo gihapon mangin aktibo ang kabataan kag maabot ang ila mga handum paagi sa nagakaigo nga pag-atipan, suporta sang pamilya kag sarig sa kaugalingon.
