Ginpaathag sang isa ka Bombo abogado nga ang Presidente sang Pilipinas lamang ang may awtoridad nga magdeklarar sa isa ka foreign diplomat, lakip ang ambassador, bilang persona non grata sa pungsod.
Sa interview sang Bombo Radyo kay Atty. Arnel Sigue, iya ginpatpat nga ang persona non grata ang isa ka Latin term nga nagakahulugan sang ‘unwelcome person’ ukon tawo nga wala na ginabaton sa isa ka lugar, komunidad, organisasyon ukon pungsod.
Suno sa abogado, sa kaso sang mga foreign diplomat, ang pagdeklarar bilang persona non grata isa ka national-level decision nga yara sa awtoridad sang Presidente, paagi sa mga nagakaigo nga diplomatic channels, lakip ang Department of Foreign Affairs (DFA).
Pahayag niya, kon magpasar sang resolusyon ang Senado ukon House of Representatives nga nagapanawagan nga ideklarar ang isa ka ambassador ukon diplomat bilang persona non grata, recommendatory lamang ini kag indi awtomatiko nga nagadeklarar sa nasambit nga opisyal.
Ini bangud nga ang pinal nga desisyon ang yara gihapon sa Presidente.
Apang, ginpaathag man sang abogado nga ang mga Local Sanggunian, lakip ang Sangguniang Panlungsod, Sangguniang Panlalawigan, Sangguniang Bayan kag Sangguniang Barangay, mahimo man magdeklarar sang isa ka tawo bilang persona non grata sa ila tagsa ka hurisdiksyon, depende sa mga sirkumstansya sang kaso.
Ini ang may kaangtanan sa ginaduso sang pila ka mga mamalidha nga ideklarar bilang persona non grata si Chinese envoy Jing Quan matapos ang iya nangin pila ka mga pahayag batuk sa Pilipinas kaangay sang wala sang bato ang pungsod sa pwersa sang China.
