Nagapanawagan ang Office of Civil Defense Region 6 (OCD-6) sa publiko kag sa nagkalain-lain nga ahensya sang gobyerno nga mangin handa sa posible nga kakulangan sang suplay sang tubig kag pagkaon bangud sa epekto sang Very Strong El Niño.
Suno kay Raul E. Fernandez, Regional Director sang OCD-6, importante nga masiguro ang husto pagpalapnag sang impormasyon agud mangin preparado ang publiko sa posible nga epekto sang malawig nga tig-ilinit.
Dapat suno sa iya nga hatagan sang atensyon ang suplay sang tubig, enerhiya kag seguridad sang publiko, nga posible maapektuhan kun magpadayon ang kakulang sang ulan.
Gindugang man sang Director ang importansya sang paghibalo sa mga kinahanglanon sang tagsa ka probinsya agud mahibaluan kun ano nga bulig ang dapat ihatag sang gobyerno sa mga komunidad nga maapektuhan.
Pahayag pa sini nga ila naman nga ginaplanuhan ang mga tikang sa pagpanghanda agud mapabakod ang koordinasyon sa tunga sang nagkalain-lain nga ahensya sang gobyerno.
Nagapangabay naman ini sa publiko nga magpabilin nga alerto, magsunod sa mga opisyal nga pahibalo kag maghanda gid para sa posible malala nga epekto sang El Niño, ilabi na sa suplay sang tubig kag pagkaon.
