Ginkumpirma sang Vatican nga nangin madinalag-on ang operasyon kay Pope Leo XIV agud kuhaon ang isa ka nodule ukon gamay nga bukol sa iya baga.
Suno sa Holy See Press Office, natapos ang operasyon suno sa gintalana nga oras kag plano.
Matapos ang operasyon, ginbalik ang 71-anyos nga Santo Papa sa iya hulot sa Gemelli Hospital sa Rome, Italy.
“Pope Leo XIV’s surgery to remove a “small, localized nodule” from his lung was successful and he has returned to his room in the Gemelli Hospital,” suno sa Holy See.
Una na nga ginpahibalo ni Pope Leo sang Domingo ang pagkadiskubre sang gamay nga bukol sa iya baga kag nagsiling nga operahan ini agud makuha.
Suno sa oncologists, pananglitan nadiskubrehan nga cancerous ang amo nga nodule, “excellent” ang prognosis bangud nga nakakas ini gilayon.
Ginapaabot nga magapabilin ang Santo Papa sa ospital sa sulod sang isa ka semana gani nga ginkansela sang Vatican ang tanan niya nga nakatalana nga pagpakigkita tubtob sa Oktubre 20.
Samtang, sandig sa Vatican, si Cardinal Luis Antonio Tagle nga amo ang Pro-Prefect of the Dicastery for Evangelization kag newly appointed Dean sang College of Cardinals, amo ang manguna sa weekly papal audience sa St. Peter’s Square sa Miyerkules, Oktubre 14, samtang ara sa ospital ang Pope.
