Ginabulubanta nga naglab-ot na sa masobra 1,000 ang mga pasahero nga naghingagaw sa pagpadulong sa Ceres Terminal sa Brgy. Camalig, Jaro, Iloilo City subong nga adlaw agud magpauli sa ila tagsa ka probinsya kadungan sang pag-obserbar sang Pista Minatay.
Ini ang sandig sa pag-check sang Bombo Radyo as of 2:00 p.m.
Sa interview sang Bombo Radyo kay Edgar Tomedo Sr., terminal in-charge sang Ceres Terminal, iya ginpahayag nga nagapatigayon sila sang inspection sa mga bus units agud nga masiguro nga maayo ang kondisyon sang tagsa ka unit antes ini magbiyahe.
Suno kay Tomedo, ginapatigayon ang inspeksyon sa tagsa ka bus sa kada abot sini sa terminal agud masiguro nga luwas sa ano man nga insidente kag masiguro gid nga safe ang mga pasahero nga magpauli sa ila tagsa ka balay.
Pahayag pa niya, asta lamang ala-syete ang byahe sang iban nga unit apang posible nga mag-extend ang operasyon sang mga bus kon may yara pa sang mga pasahero.
Ginapanawagan man ni Tomedo sa mga pasahero nga magplano sang maayo sang ila pagbiyahe ilabi na ang pagkadto sa terminal sang timprano agud malikawan ang pagdugok sa pila.
Dugang pa, ginalauman nga magadamo pa ang mga pasahero sa nasambit nga terminal subong nga hapon tubtob bwas nga adlaw, Nobyembre 1.
