Ginpaidalom sa Blue Alert status ang Iloilo City Emergency Operation Center umpisa subong nga adlaw, Oktubre 31 tubtob Nobyembre 3 kadungan sang pagsaulog sang Undas 2026.
Sa interview sang Bombo Radyo kay Joy Fantilaga-Gorzal, spokesperson ni Mayor Raisa Treñas, iya ginpahayag nga ang pagpaidalum sang operation center ang kabahin sang preparasyon sang Iloilo City Government agud masiguro ang seguridad sang mga pumuluyo nga nagabisita sa mga public kag private cemeteries sa syudad.
Suno sa iya, magluwas 24/7 nga operasyon sang Emergency Operation Center, naka-standby man ang mga district kag barangay Disaster Risk Reduction and Management Councils agud mas mapadasig ang deployment kag koordinasyon sang mga response team kon may yara sang emerhensya.
Pahayag pa niya, nag-deploy man ang syudad sang masobra 300 ka traffic enforcers, kapin 450 ka pulis, kag may yara pa sang mga barangay tanod kag iban nga support teams agud magbuligay sa pagmintinar sang katawhay kag kalinong sa mga patyo.
Ginpahanumdom man ang publiko nga antes maghalin sa ila mga balay, patyon kag i-unplug ang mga electrical appliances nga wala ginagamit, siguruhon nga nakasirado ang mga puertahan kag bintana, kag indi pagbayaan nga nagasiga ang mga kandila.
Ginapanugyan man nga siguraduhon nga fully charged ang mga cellphone kag naka-save ang emergency hotline numbers agud makatawag gilayon sa tion sang emerhensya.
Dugang pa, ginapahanumdom man ang mga pumuluyo nga mangin responsable sa pag-share sang impormasyon sa social media kag likawan ang pag-post sang ila real-time nga lokasyon agud indi mahibaluan sang indibidwal nga may malain nga tinutuyo nga wala sang tawo sa isa ka balay.
