Malaka pa lamang ang nagabakal sang bulak sa Jaro Plaza sa Iloilo City duha ka adlaw antes ang Pista Minatay.
Sa interview sang Bombo Radyo sa flower vendor nga si Larry, iya ginpahayag nga ginapaabot nila nga sa Oktubre 31 kag Nobyembre 1 pa magadugok ang mga manugbakal.
Pahayag sini, mas makabarato kag mas matawhay kun subong na nga daan magbakal bangud nga limitado lang ang ila suplay kag posible nga maubos.
Ginpakigbahin sini nga sa Dangwa Flower Market sa Manila ginbakal ang iya mga bulak nga ginabaligya, kag apisar nga madamo pa ini subong, kumpyansa siya nga maubos ini kaangay man sang tinalikdan nga tuig.
Nahibaluan nga sa pwesto sini kag sa iya kaupdanan sa Jaro Plaza, naga-range sa P200 tubtub P300 ang presyo sang bulak kada putos — depende sa klase kag sa kadamuon; samtang may bundle naman nga nagabalor sang P700 tubtub P1,000.
Sa Executive Order (EO) No. 103, Series of 2026 ni Iloilo City Mayor Raisa Treñas, dapat nga may special permits gid ang flower vendors sa Iloilo City para sa pag-obserbar sang All Saints’ Day kag All Souls’ Day.
Lima lamang ka lugar ang gintalana nga mahimo baligyaan sang bulak nga amo ang Jaro Plaza, Molo Plaza, Mandurriao Plaza, Arevalo Plaza kag Iznart Street sa City Proper.#
