Nagpanugyan ang Iloilo City Disaster Risk Reduction and Management Office ukon CDRRMO sa publiko samtang nagahilapit na ang pagselebrar sang Pista Minatay nga antes magkadto sa patyo, magdala sang tubig kag magpabilin nga hydrated, ilabi na ang mga senior citizen kag may yara sang balatian.
Suno kay Darwin Joemil Papa, chief sang Disaster Response Division, likawan ang pagbisita sa mga oras nga tuman kainit, partikular halin alas-10 sang aga tubtob alas-3 sang hapon, ilabi na sa mga open area.
Pahayag pa ni Papa nga kun indi malikawan ang amo nga oras, ginapahanumdom ang publiko nga magdala sang payong kag indi magsuksok sang dark color nga bayo.
Apisar suno sa iya nga indi malikawan ang pagkadto sa mga sementeryo bangud kabahin na ini sang tradisyon sang kadam-an nga pamilya, nagpanugyan ini nga kun may mabatyagan nga indi maayo gilayon nga magkadto sa gindesignar nga mga booth para sa onsite check-up agud mahatagan sang medical assistance.
