Posible nga magmahal ang imported nga bugas kag abono sa Pilipinas bangud sa padayon nga paghina sang balor sang piso kontra dolyar.
Suno kay Agriculture Assistant Secretary Arnel de Mesa, nagadepende sa mga supplier sa iban nga pungsod ang suplay sang abono sang Pilipinas, gani mahimo man ini maapektuhan sang paghina sang piso.
Posible man nga magtaas ang presyo sang pagbiyahe sang mga produkto bangud sa pagbag-o sang presyo sang mga produktong petrolyo, nga mahimo magresulta sa pagsaka sang presyo sa merkado.
Sa subong, nagabalor sang P50 tubtob P55 kada kilo ang imported nga bugas nga may 25% nga broken grains.
Apang ginpabutyag ni De Mesa nga wala pa niya ginapaabot nga maglapaw sa P60 kada kilo ang presyo sang bugas, bangud mas barato ang presyo sini sa international market bangod sa bastante nga suplay.
Suno sa iya, yara sa harvest season ang Vietnam kag India, nga amo ang mga pungsod nga ginakuhaan sang bugas sang Pilipinas, gani mahimo ini makapugong sa daku nga pagsaka sang presyo.
Ginapaabot nga mabatyagan sang mga konsumidor sa tunga-tunga sang Nobyembre ang posible nga pagsaka sang presyo, bangud nagalab-ot sa duha ka semana ang pagbiyahe sang bugas halin sa Vietnam.
Base sa pinakabag-o nga datos sang Bureau of Plant Industry, nagalab-ot na sa 4.37-million metric tons ang bugas nga na-import sang Pilipinas tubtob Oktubre 22.
Ginapaabot man nga malab-ot sa sobra 5-million metric tons ang bugas nga iga-import sang pungsod sa sini nga tuig bangud sa epekto sang El Niño sa lokal nga produksyon.#
