Gintudlo ni anay Department of Public Works and Highways (DPWH) Undersecretary Roberto Bernardo si Senator Panfilo ‘Ping’ Lacson nga amo lamang suno sa iya nahibaluan ang wala na-involve sa mga kickback scheme nga may kaangtanan sa mga proyekto sang imprastraktura sang gobyerno.
Ini ang ginpahayag ni Bernardo sa pagpamangkot ni Associate Justice Ronald Moreno sa iya sa Sandiganbayan kun may mga mamalidha nga wala nakabaton sang commitment fee ukon kickback halin sa mga proyekto.
Suno kay Bernardo, wala siya sang nahibaluan nga kongresista nga ginhatagan sang tanyag nga kickback kag nagbalibad sini; apang dugang sini, base sa iya nahibaluan, wala sang commitment si Lacson.
Suno pa kay Bernardo, ang commitment fee nga gin-allocate kay anay Senador Nancy Binay ang naglab-ot sa 12 tubtob 15 porsyento, samtang 20 porsyento naman kay anay Senador Grace Poe kag 18 tubtob 25 porsyento kay Senador Jinggoy Estrada.
Ginhingadlan man ni Bernardo ang isa ka lalaki nga si Carlo Aguilar, nga iya ginlaragway nga pakaisa ni Senador Mark Villar, anay tiglikom sang DPWH, nga gin-alegar nga ginhatagan sang lima ka porsyento halin sa P500-million nga lump sum fund sang ahensya.
Suno kay Bernardo, ginpalapitan siya ni Aguilar agud mamangkot kon may pondo nga mahimo marelease kag mapirmahan para kay Villar.
Dugang pa ni Bernardo, nakita niya sa pila ka okasyon nga magkaupod sanday Villar kag Aguilar, samtang ginbahin niya ang nabilin nga lima ka porsyento sa napatay na nga anay DPWH Undersecretary nga si Maria Catalina Cabral.
Samtang, gin-athag man ni Bernardo sa Sandiganbayan nga wala siya ginpangayuan ni anay House Speaker kag Leyte Representative Martin Romualdez sang listahan sang mga proyekto sang imprastraktura bilang kabaylo sa kickback.
Sa hearing sa petisyon ni Romualdez para sa piyansa sa kaso nga plunder nga nagabalor sang 7.4 bilyon pesos, ginpahayag ni Bernardo nga wala niya ginhingadlan sa iya mga affidavit si Romualdez bilang isa ka tawo nga nagpangayo sang proyekto ukon bilang proponent sang mga proyekto sang gobyerno.
Apang gin-ako ni Bernardo nga nakabaton siya sang pinansyal nga benepisyo halin sa mga proyekto sang imprastraktura nga may kaangtanan sa nagkalain-lain nga proponents, nga iya ginatawag nga “balato” ukon token.
Suno pa sa iya, sanday Alcantara kag anay DPWH National Capital Region Director Gerard Opulencia ang nagahatag sang listahan sang mga proyekto para sa mga mamalidha nga proponents kag nagakolekta man sang commitment fee halin sa mga kontraktor, nga suno sa iya, ginagamit bilang kickback para sa mga proponents.#
