Ginpasugtan sang Sandiganbayan si anay House Speaker Martin Romualdez nga magtambong sa pretrial sang iya plunder case paagi lamang sa videoconference.
Suno ini kay Dennis Pulma, clerk of court sang Sandiganbayan Third Division.
Matabo ang pretrial 8:30 sa aga bwas, Septyembre 25.
Ginpahayag pa sang clerk nga wala pa nakapasa si Romualdez sang petition for bail sa plunder case.
Dugang niya, posible nga matalakay ini kadungan na sang pretrial proceedings.
Sang nagligad nga semana, ginpahayag sang abogado sang former speaker nga si Rachel Ann Pomoy sa korte nga nagaplano sila nga mag-file sang petition for bail.
Ang plunder isa ka non-bailable offense, apang mahimo ini nga hatagan sang pyansa kun indi mabaskog ang ebidensya batok sa akusado. Ini mahimo lamang maestablisar sa tion na sang bail hearing.
Antes sini, nag-plead nga “not guilty” si Romualdez sa iya kaso paagi man sa teleconferencing.
Sang September 7, nagpagwa ang Sandiganbayan Third Division sang arrest warrants batok kay Romualdez, anay Ako Bicol party-list Representative Zaldy Co, kag duha ka iban pa. Ginkasuhan sila sang plunder may kaangtanan sa ginasuspetsuhan nga kickbacks nga nagabalor sang P7.44-billion.
Suno sa mga prosecutor, ang ginasuspetsuhan nga kickbacks naghalin sa mga contractor, indibidwal kag mga entity nga may interes sa flood control, infrastructure kag iban pa nga proyekto sang gobyerno nga ginpondohan paagi sa General Appropriations Acts para sa fiscal years 2022 tubtob 2025.
Naospital pa si Romualdez sang halos isa ka semana antes siya gindala sa kustodiya sa New Quezon City Jail-Male Dormitory sang September 14.#
