Kumpiyansa ang legal team ni Vice President Sara Duterte nga magatambong ang ila mga masunod pa nga mga testigo sa impeachment trial sa Senado, sa pihak sang pag-atras sang duha ka una nga gin-imbitaran nila nga testigo.
Suno kay Atty. Michael Poa, spokesperson sang defense team, nagasalig sila sa mga subpoena nga ginpagwa sang korte agud masiguro ang pagtambong sang ila mga testigo sa masunod nga mga hearing.
Nahibaluan nga nag-atras bilang testigo si anay Dean Ralph Sarmiento bangud sa personal nga rason, samtang si Atty. Suzette Punay naman nagpangabay nga ma-excuse sa trial sang Lunes bangud may nakatalana siya nga MRI procedure.
Ginklaro ni Poa nga isa lamang ka adlaw ang ginpangabay ni Punay nga indi pagtambongon kag wala ini nagakahulugan nga indi na siya magtestigo sa masunod nga mga hearing.
Nahibaluan nga nakatalana nga magapresentar ang depensa sang kapin 20 ka testigo sa sini nga semana agud sabton ang nabilin nga impeachment article batok kay Duterte.
Ang mga alegasyon nagalakip sang betrayal of public trust bangud sa iya nga unexplained wealth, isyu sa iya nga SALN, kag wala sini pagbiya sa iya mga interes sa negosyo samtang nagaserbisyo bilang Bise Presidente.
