Nagalaum ang House prosecution team nga magapresentar man ang defense team sang mas maayo nga mga testigo sa impeachment trial nga makahatag sang klaro nga sabat sa tagsa ka pamangkot ilabi na ang may kaangtanan sa unexplained wealth ni Vice President Sara Duterte.
Ini ang pahayag ni House Prosecution Panel Member kag Bicol Saro Representative Terry Ridon matapos niya nga ginlaragway nga “mali-mali” ang mga sabat ni Davao City Assessor Engineer Jamie Adalin ang amo ang una nga testigo sang defense panel.
“Wasak po talaga ang kredibilidad ng testigo,” suno kay Ridon. Gindugang sini nga wala siya nakahibalo kun sin-o ang ginatakpan ni Adalin. “Kung sa ganiyan kasimpleng mga bagay, hindi natin siya mapagkatiwalaan, paano natin siya pagkatiwalaan doon sa mas seryosong mga tanong, di ba?”
Gin-akusaran pa ni Ridon ang City Assessor nga daw ginatunto sini ang mga senator-judge matapos nga ginpaandaman ini kaina ni Senator Erwin Tulfo nga posible ini ma-contempt kag ginsaway man ni Senator-Judge Risa Hontiveros bangud sa pagkadlaw bisan nga indi man nagakaangay nga kadlawan ang mga pamangkot nga ginapamangkot sa impeachment court.
Ginapahayag man ni Ridon nga maayo na lamang nga indi na magbalik si Adalin bilang testigo.
Gindepensahan man sini ang pagpamangkot kaangot sa “group tour” sa China sa tunga sang mga nagakwestyon kun ano ang labot sini sa impeachment case.
“Kredibilidad ho ng witness yun eh, kung nagsasabi ba siya ng totoo,” suno kay Ridon. “Nasa kapangyarihan po ng nag-co-cross examine po yun para ma-test ang kredibilidad.”
“Huwag silang mag-iyak-iyak na tinanong siya tungkol po diyan sa mga bagay na yan,” suno pa sa kongresista.
Bwas nga adlaw, maga-testigo si Atty. Suzette Balucanag-Punay, corporate counsel sang GenCorp Industries Inc., matapos nga nag-request ini nga magpaiway kaina bangud magapaidalum ini sa magnetic resonance imaging (MRI).
Nahibaluan nga kapin sa 20 ka testigo ang ginhingyo sang defense team nga ipatawag paagi sa subpoena halin Lunes tubtob Biyernes sini nga semana.#
