Nagpanawagan ang 20 ka senador kay Presidente Ferdinand Marcos Jr. nga ideklarar ang “super El Niño calamity” sa mga lugar sa pungsod nga apektado ukon yara sa peligro nga maapektuhan sini agud malikawan ang dugang nga peligro sa seguridad sang pagkaon kag suplay sang tubig.
Paagi sa Proposed Senate Resolution No. 765, ginapangabay sang mga senador si Marcos nga magdeklarar sang state of calamity ukon state of imminent disaster suno sa rekomendasyon sang National Disaster Risk Reduction and Management Council ukon NDRRMC.
Lakip sa mga nagpirma sa resolusyon amo sanday Senate President Win Gatchalian, Senate President Pro Tempore Tito Sotto, kag mga senador nga sanday Kiko Pangilinan, Imee Marcos, Robin Padilla, Migz Zubiri, Bam Aquino, Risa Hontiveros, JV Ejercito, Lito Lapid, Joel Villanueva, Erwin Tulfo, Raffy Tulfo, Ping Lacson, Chiz Escudero, Alan Peter Cayetano, Pia Cayetano, Bong Go, Camille Villar kag Mark Villar.
Ginbutang sa resolusyon ang pagkinahanglan nga gilayon nga mahatagan sang lihok ang report sang DOST-PAGASA nga yara na sa Tropical Pacific ang strong to very strong El Niño.
Ginalantaw nga posible ini mag-peak antes matapos ang tuig kag mahimo magpadayon ang epekto sini sa pungsod tubtob sa una nga bahin sang 2027.
Sandig sa layi, kun ideklarar ang state of calamity, mahimo nga magamit liwat ukon ibalhin ang pondo para sa pag-ayo kag pagpaayo sang mga pampubliko nga imprastraktura kag pasilidad. Nagatugot man ini sa paghatag sang mga loan nga wala sing interes para sa mga sektor nga pina-naapektuhan, suno sa nagapatuman nga mga kasuguan.#
