Nagpahanumdom ang Provincial Government Environment and Natural Resources Office (PGENRO) sa mga pumuluyo sang probinsya nga magkinot gid gihapon sang tubig apisar nga ma-eksperyensyahan pa man subong ang lapta-lapta nga pag-ulan.
Sa interview sang Bombo Radyo kay Forester Mitzi S. Peñaflorida, supervising environmental management specialist sang PGENRO, iya ginpahayag nga may mga banwa nga ginabaha pa gani kaangay sang natabo sa weekend, apang indi ini dapat paghimuon nga rason suno sa iya nga magpakampante.
Suno kay Peñaflorida, may mga banwa nga nagasiling may bastante pa sila nga suplay, apang may mga munisipalidad man nga nag-report na sang pagnubo sang lebel sang tubig sa mga bubon, springs, kag iban pa nga sources nga ginagamit sang mga pumuluyo para sa ila adlaw-adlaw nga kinahanglanon.
Wala ginhingadlan sang opisyal kun ano ini nga mga banwa.
“May mga municipalities na gid nga nagamuno nga naga-amat-amat na gid ya nubo ang ila water sources, so subong ang Province sang Iloilo naga-prepare naman kami sang measures kun paano sila buligan, mga scheme sa rationing kun kinahanglan nila, kag naga-identify naman sang possible sources nga maka-augment sa mga municipalities diri sa probinsya,” suno kay Peñaflorida.
Pananglitan maglab-ot sa pag-rasyon sang tubig suno sa iya, nakahanda naman ang truck sang probinsya kag ginalantaw nga makabakal sang 10-cubic-meter drum.
Sa sini nga contingency arrangement, ang mga truck sa Provincial Engineering Office (PEO) amo ang maga-deliver sang tubig sa apektado nga mga area.
May natumod naman ang PGENRO kag ang PEO nga potential water collection points para sa sini nga emergency distribution operations.
Ginmanduan man ang 43 ka local government units (LGUs) nga maghimo sang inventory sang ila nga water sources lakip na sa mga bubon, bomba, kag springs.
Ini agud nga mahibaluan kun ano nga sources ang magamit pa, ano pa kadamo nga tubig ang available, kag kun masustiner pa sang existing supplies ang mga komunidad kun maglawig ang dry conditions.
Matandaan nga ginkumpirma sang Philippine Atmospheric, Geophysical and Astronomical Services Administration (PAGASA) sini nga semana nga naga-eksister na ang “very strong” El Niño sa tropical Pacific kag mahimo malab-ot ang peak sa katapusan sang tuig kag magalawig tubtub sa una nga bahin sang 2027.
