Naka-eksperyensya na sang pagnubo sang lebel sang tubig ang tatlo ka mga irrigation systems sa probinsya sang Iloilo kasunod sang opisyal nga pagsugod sang dry spell condition.
Ini ang sandig sa latest monitoring sang Iloilo Provincial Government Environment and Natural Resources Office (PGENRO) nga napetsahan nga Nobyembre 5, 2026.
Sa amo nga data, nakit-an nga may nagapanguna nga pagnubo sa water level sa Aganan River Irrigation System sa Barangay Igtambo, San Miguel, Iloilo kun sa diin na-rekord ang 1.5-meter level halin sa normal level nga 2.6 meters.
Ini nga irrigation system ang may yara sang service area nga 2,828.99 hectares kag ginakuhaan sang tubig sang masobra 2,100 ka farmer beneficiaries halin sa 28 ka mga barangay sa San Miguel, Oton, Pavia, kag Santa Barbara.
Magluwas diri, sa Sibalon River Irrigation System sa Barangay Anonang, Leon, Iloilo, nagnubo naman sa 1.85 metros ang lebel sang tubig halin sa normal level nga 2.2 meters.
Ini nga irigasyon amo ang nagaserbe sa 2,283 hectares nga naga-cover sa Leon, Alimodian, kag Tigbauan.
Dugang pa, sa Tigum River Irrigation System sa Barangay Tungay, Santa Barbara, nagnubo sa 1.77 meters ang lebel sang tubig halin sa normal level nga 1.8 meters.
Ini naman nga irigasyon ang nagahatag sang tubig sa daku nga porsyon sang Santa Barbara, Cabatuan, Pavia, Leganes, kag Iloilo City.
Sa interview naman sang Bombo Radyo kay Forester Mitzi Peñaflorida, ang supervising environmental management specialist sang PGENRO, iya ginpahayag nga gina-conduct nila ang monitoring sa irrigation systems amo man sa mga dam agud nga matumod kun ano kalawig ang itiner sang reserves kun magbuhin gid man ang available supplies bangud sa Super El Niño.
Suno kay Peñaflorida, maga-isyu sila gilayon sang water conservation advisories kun makit-an sa monitoring results nga nagalab-ot na sa alarming levels ang suplay.
Ginmanduan man ang 43 ka local government units (LGUs) nga maghimo sang inventory sang ila nga water sources lakip na sa mga bubon, bomba, kag springs.
Ini agud nga mahibaluan kun ano nga sources ang magamit pa, ano pa kadamo nga tubig ang available, kag kun masustiner pa sang existing supplies ang mga komunidad kun maglawig ang dry conditions.
Matandaan nga ginkumpirma sang Philippine Atmospheric, Geophysical and Astronomical Services Administration (PAGASA) sini nga semana nga naga-eksister na ang “very strong” El Niño sa tropical Pacific kag mahimo malab-ot ang peak sa katapusan sang tuig kag magalawig tubtub sa una nga bahin sang 2027.
