Ginpasiguro sang Department of Education (DepEd) VI nga may yara sang nagakaigo nga mga patikang agud masiguro nga magapadayon ang pagtuon sang mga estudyante kadungan sang mga suspesyon bangud sa epekto sang El Niño.
Sa interview sang Bombo Radyo kay Atty. Russell Tabang, legal officer sang DepEd Schools Division of Iloilo City, iya ginpahayag nga mahimo gamiton ang modular kag online learning bilang alternatibo sa face-to-face classes.
Suno kay Atty. Tabang, pamilyar na ang mga manunudlo kag mga buluthuan sa nasambit nga mga pamaagi bangud nagamit na ini sang panahon sang COVID-19 pandemic.
Pahayag pa niya, nagahimo pa sang dugang nga learning modalities ang DepEd, lakip na pagpakig-angot sa mga media outlet agud makakuha sang airtime apang nakadepende sa gihapon sa masarangan sang ila budget.
Ginpahayag niya, paagi sini, mahimo ma-deliver ang mga leksyon sa mga estudyante paagi sa radyo, telebisyon kag newspaper.
Ginatun-an man sang ahensya ang effectiveness sang modular kag online learning sa mga estudyante agud masiguro nga may matun-an ang mga ini.
Ginpatpat man ni Atty. Tabang nga kon may kahigayunan, mahimo man pabalikon ang mga estudyante sa eskwelahan bisan isa ka beses kada semana agud ma-clarify ang ila mga natun-an sa learning materials.
Pagahatagan man ang mga ini sang exam kag activities agud mahibaluan kon naintindihan ang ila mga leksyon.
Dugang pa nga kon may makita nga kakulangan sa ila pagtuon, pagahatagan sila sang remedial classes agud masiguro nga may nahibaluan sila antes magpadayon sa masunod nga leksyon.
