Nagsugod na sa pag-hire sang external tutors ang Department of Education (DepEd) para sa Academic Recovery and Accessible Learning (ARAL) Program agud mabuhinan ang workload sang mga manunudlo.
Suno kay Education Secretary Sonny Angara, ginpalab-ot sa iya sang mga regional director kag school division superintendent nga may hiring na para sa mga external tutors nga magabulig sa pagtudlo sa mga estudyante nga nalakip sa programa.
Ginsiling ni Angara nga importante ini nga tutors agud indi na magkadto lamang sa mga regular nga manunudlo ang responsibilidad nga maghatag sang dugang nga academic assistance sa mga learners.
Sa subong, padayon nga ginapatuman ang ARAL Program sa pungsod bilang kabahin sang tikang sang gobyerno nga masolusyunan ang learning gaps sa mga estudyante.
Nagalaum ang tiglikom nga makabulig ang nasambit nga programa sa pagpasanyog sang literacy kag numeracy skills sang mga bumulutho.
