Magapanagtag ang Department of Education (DepEd) sang masobra 100,000 ka Apple MacBook Neo laptops sa mga manunudlo kag administrative staff sang mga pampubliko nga eskwelahan sa bug-os nga pungsod.
Suno sa DepEd, nakumpleto na ang competitive bidding para sa pinakabag-o nga computerization project sang ahensya kun sa diin ginapaabot nga magasugod ang pagpanagtag subong nga Nobyembre tubtob Marso 2027.
Suno kay Palace Press Officer Undersecretary Claire Castro nakuha ang kada laptop sa balor nga P42,000 tubtob P43,000, mas manubo sa malapit P50,000 nga suggested retail price sini.
Pahayag pa, lakip man sa programa ang lima ka tuig nga warranty kag training agud mabuligan ang mga manunudlo sa paggamit sang teknolohiya sa ila trabaho.
Dugang pa ni Castro, paagi sa sini nga mga kagamitan, mas mapadali ang trabaho kag mas makapokus ang mga manunudlo sa pagtudlo sa mga estudyante.
