Patay ang 30-anyos nga Spanish footballer nga si Jesús de Miguel Alameda sang CD Tenerife matapos mag-angkon sang cardiac arrest kasunod sang mabaskog nga on-field collision ukon pagbungguanay nila ni FC Andorra goalkeeper Jesús Owono sa hampang sang Spanish second division sang Nobyembre 2.
Natabo ang insidente sa stoppage time sang magguwa sa iya penalty area si Owono agud i-clear ang bola, apang mabaskog nga nagbunggoanay ang duha, nga nagresulta sa pagkadula sang pangkalibutan ni De Miguel.
Gilayon ginhatagan sang medical assistance si De Miguel kag na-resuscitate sa football field antes gindala sa ospital, apang naglala ang iya kondisyon kag ginbawian sang kabuhi kagab-i, Nobyembre 3.
Gin-abandona ang hampang nga tabla sa iskor nga 2-2, samtang ginhatagan si Owono sang straight red card bangod sa insidente.
Bangud sa insidente, gin-deactivate ni Owono ang iya social media accounts matapos makabaton sang pagpang-insulto kag pagpang-abuso online halin sa pila ka fans.
Samtang, ginpahayag man sang FC Andorra nga wala sang tuyo ang ila goalkeeper nga halitan si De Miguel.
