Ginaduso sang Department of Education (DepEd) ang liwat nga pagpabaskog sang chess, sports, school clubs, scouting kag iban pa nga extracurricular activities sa eskwelahan sa tunga sang mga insidente sang kalakasan nga involved ang mga estudyante.
Suno kay Education Secretary Sonny Angara, kalakip ini sa mga direktiba ni Presidente Ferdinand Marcos Jr. agud maengganyo ang mga kabataan nga makahimo sang personal nga koneksyon sa ila kaangay nga learners.
Pahayag ni Angara nga sa panahon subong kun sa diin halos indi na maseparar ang mga bata sa ila nga mga cellphone kag iban pa nga gadgets bangud sa social media, importante nga may yara sila sang mga aktibidad nga magahatag sang kahigayunan para sa aktuwal nga interaksiyon sa iban.
Suno sa tiglikom, ini nga mga aktibidad ang tuman ka praktikal bangud indi na kinahanglan sang dako nga gasto agud hampangon ini sa mga eskwelahan.
Ini nga mensahe ni Angara ang kadungan sang iya pagtambong sa pinakauna nga Literacy and Numeracy Expo cum Training of Trainers on the Institutionalization of Technical Assistance on Instructional Delivery sa Punta Villa Resort Inc., Iloilo City subong nga adlaw, Nobyembre 4.
