Gina-abi-abi sang mga traffic enforcers sa syudad sang Iloilo ang temporaryo nga pagkaskas sang ila nga visibility vest kasunod sang tuman ka init nga tyempo nga tuga sang El Niño.
Sa interview sang Bombo Radyo, ginpaathag ni Ryan Blancada, traffic supervisor sa distrito sang Jaro, iya ginpahayag nga sa tion nga tuman ka init nga tyempo kag suksok nila ang ila nga vest, nagadugang ang kapaang nga ila ginabatyag.
Ini bangud nga ang nasambit nga vest ang human sa plastic, nga mahimo nakahatag sang daku nga discomfort sa mga traffic enforcers ilabi na kun ang mga ini ang nagapati-al sa init.
Suno kay Blancada, sa tion nga kaangay nagapaligo na sila sang ila balhas kasunod sang madugay nga pagbulad sa init, nagaresulta ini sang tuman ka kapoy sa ila nga posible makaapekto man sa ila ikaayong lawas.
Bangud sa panugyan sang mga traffic enforcers, naghatag sang mandu ang Iloilo City Traffic and Transportation Management Office (ICTTMO) nga ubahon sang ila vest sugod alas-9 sa aga tubtob alas-5 sang hapon.
Apang, kinahanglan liwat suksok sang vest pag-abot sang gab-i bangud nga nagserbe man ini bilang reflectorized vest agud nga makita sila sang mga motorista kag masiguro ang ila safety.
Pahayag pa ni Blancada, daku nga bulig sa ila pag-duty ang temporaryo nga pag-uba sang vest bangud mas makabatyag sila sang mas maayo nga airflow samtang nagaserbisyo sa dalanon.
Nahibaluan nga pila na ka sunod nga adlaw nga nagdangat na sa masobra 40 °C ang heat index sa syudad.
Bangud sini, gina-abisuhan gid ang mga traffic enforcer sa pag-inom sang tubig kag pagpahuway kon sobra na ang kainit nga tyempo agud malikawan ang mga heat-related illnesses.
